မြန်မာအက္ခရာဖောင့်များ ပြောင်းလဲခြင်း

အက္ခရာပုံစံများလေ့လာခြင်း

ZINBO (Graphic Design နဲ့ Font Design ရေးသူ)

မြန်မာအက္ခရာပုံစံတွေကိုလေ့လာရင်နဲ့ ကျောက်စာ၊ ပေစာ၊ ပုရပိုက်စာ စတာတွေထဲက သဘောကျမိတဲ့ဟန်လေးတွေကို ပြန်လည်ရေးဆွဲတင်ပြလိုက်ပါတယ်။ ပျူစာ၊ ပုဂံကျောက်စာ၊ ပေစာ၊ ပုရပိုက်စာ၊ ပုံနှိပ်စာ ဆိုပြီးစဉ်ထားပါတယ်။ အဓိကကတော့ မတူညီတဲ့ရေးဆွဲဟန်လေးတွေကို လေ့လာတာမို့၊ ခေတ်တွေကတော့ ရှေ့နောက် အရမ်းကွာနေတာ နားလည်ပေးပါ။ အားလုံးကို သူ့မူရင်းအရသာဟန်လေးတွေရအောင် ကြိုးစားရေးဆွဲထားပါတယ်။ “နမောတဿ ဘဂဝတော အရဟတော သမ္မာသမ္ဗုဒ္ဓဿ” ဆိုတဲ့စာကြောင်းကတော့ ကျောက်စာ၊ ပေစာ၊ ပုရပိုက်စာ စတဲ့စာအချို့ရဲ့အစမှာ ရေးလေ့ရှိတဲ့စာကြောင်းလေးမို့ အားလုံးကို အဲ့စာကြောင်းလေးနဲ့ပဲရေးထားပါတယ်၊ ရာဇကုမာရကျောက်စာမှာတော့ “နမောဗုဒ္ဓာယ” ဆိုတာလေးနဲ့စထားတာတွေ့မိပါတယ်။ စာကြောင်းတွေကို တွဲယှဉ်ကြည့်ခြင်းဖြင့် ပြောင်းလဲလာတဲ့ အက္ခရာပုံစံတွေ ရေးဟန်တွေကိုလည်း လေ့လာနိုင်မယ်လို့ မျှော်လင့်ပါတယ်။

ပထမဆုံးစာကြောင်းကတော့ အရင်ကဆွဲဖူးတဲ့ ပျူစာကြောင်းအဟောင်းကိုပြန်ထည့်ထားတာပါ။

ဒုတိယအက္ခရာကတော့ ပုဂံခေတ်ကရေးဟန်ပါ၊ ပြန်ကူးဆွဲတဲ့ ကျောက်စာပါသက္ကရာဇ်အရတော့ ရာဇကုမာရကျောက်စာထက် နှစ် ၂ရာဝန်းကျင်လောက် နောက်ကျမယ်ထင်ပါတယ်။ ရေးဟန်က လေးထောင့်ဟန်ကိုအသားပေးထားပြီး အကွေ့ဝိုက်လေးတွေလဲပါဝင်ပါတယ်။

တတိယ တစ်ခုကတော့ ရတနာပုံခေတ်လောက်က ပေစာတစ်ခုကပါ ပေချပ်ပေါ်မှာ မင်/ဆေးနဲ့ရေးထားတာမျိုးပါ၊ လေးထောင်ဟန်ရေးထားပြီး အထူပါးလေးတွေနဲ့ ရေးဟန်တွေလဲ အတော်စနစ်ကျပါတယ် မြန်မာ Black Letter လို့ပြောရမလိုပါပဲ။

စတုတ္ထတစ်ခုကတော့ စစ်ကိုင်းသမိုင်းစားပေ ဆိုတဲ့ပုံကနေ ပြန်ကူယူဆွဲထားတာပါ၊ ပေချပ်ပေါ်မှာ ကညစ်နဲ့ရေးထားတာမျိုးပါ၊ တွေ့ဖူသလောက်ပေစာတွေထဲမှာ သဘောကျမိတဲ့ရေးဟန်လေးပါ၊ သိကြတဲ့အတိုင်း လေးထောင်ဟန်ရေးရင် ပေရွက်ကျောတွေပျက်တတ်လို့ အဝိုင်းဘက်ကိုရောက်လာတဲ့ ရေးဟန်ပါ၊ တွေ့မိတာလေးတစ်ခုက ခုလိုပေစာတွေမှာ မှားရေးမိရင် အလယ်မှာ ဝတ်ဆံလေးထည့်ပြီး ဖျက်တဲ့သဘောရှိပါတယ်၊ ပုံထဲမှာလည်ထည့်ထားပါတယ်။

ပဉ္စမတစ်ခုကတော့ ရွှေနန်းလက်သုံးပုံ ပုရပိုက်ထဲက ရေးဟန်နဲ့ရေးထားတာပါ၊ ပုရပိုက်ဖြူဆိုတဲ့ စက္ကူပေါ်မှာ မင်/ဆေးနဲ့ ရေးထားဟန်ရှိပါတယ်၊ အဝိုင်းမကျ လေးထောင့်မကျ အတော်လေးလှတဲ့ ရေးဟန်လို့မြင်မိပါတယ်။

နောက်ဆုံးတစ်ခုကတော့ ပုံနှိပ်စာ လို့ပြောရမယ် ပုံနှိပ်ခေတ်အစေားပိုင်းသုံးခဲ့တဲ့ ခဲစာလုံးဟန်၊ ကျနော့်ရဲ့ Z03-Press နဲ့ရေးထားတာလေးပါ။

စာအရမ်းရှည်သွားမှာစိုးလို့ အတိုချုံ့ရေးထားပါတယ်။ သမိုင်းနဲ့ပတ်သက်လို့ မသိနာမလည်တာတွေများတာမို့ လိုအပ်တာများရှိရင် ဝေဖန်အကြံပြုနိုင်ပါတယ်ခဗျ။

အားလုံးပဲအဆင်ပြေကြပါစေ။

• https://www.facebook.com/share/p/1EFsNpLZo7/